გილოცავთ შობის ბრწყინვალე დღესასწაულს!

"ზეიმობს ცა და ქვეყანა, ხარობს ღვთისმშობელი, რადგან დღეს ნეტარების საუფლოდან განდევნილი ადამის მოდგმა განღმრთობას იწყებს და ჩვენი დაცემული ბუნება სამეუფო ღირსებით იმოსება. ჩვენ მოვიყაროთ მუხლნი გულისა ჩვენისანი წინაშე უფლისა და დედა ღვთისმშობელს შევთხოვოთ, განგვიღოს მოწყალების კარი, რათა მადლით აღავსოს ყოველნი მორჩლებით მისგან წყალობის მომლოდინენი.“
სრულიად საქართველოს კათოლიკოს პატრიარქი ილია მეორე.

საშობაო სპექტაკლი

წმინდა ალექსი შუშანიას სახელობის მართლმადიდებლურ სკოლა-გიმნაზიაში ტრადიციად იქცა საშობაო სპექტაკლი მოსწავლეების მონაწილეობით. ამჯერად სტუმრებს ვთავაზობთ პოეტ ანზორ სალუქვაძის ზღაპრის ,,შეთე და ცისყამარი“-ს მიხედვით დადგმულ წარმოდგენას, ,,იყო შაშვი მგალობელი, ღმერთი ჩვენი მწყალობელი“, რომელიც 2018 წლის 9 იანვარს გაიმართება.

ინტელექტუალური თამაშის

2017 წლის 27 ნოემბერს, სკოლა-გიმნაზიის პედაგოგებს შორის, ჩატარდა ინტელექტუალური თამაშის ,,რა? სად? როდის?“ მეორე ტური. თამაში ძალიან საინტერესოდ და ხალისიანად წარიმართა. ეს პროექტი ერთ-ერთი წარმატებულია სკოლა-გიმნაზიაში და ხელს უწყობს პედაგოგიური კოლექტივის გაერთიანებას და ინტელექტუალურ განვითარებას.

მილოცვა

2017 წლის 23 ნოემბერი ისტორიული აღმოჩნდა სენაკისა და ჩხოროწყუს ეპარქიისათვის. ჩვენი მღვდელმთავარი მიტროპოლიტი შიო (მუჯირი) საქართველოს კათოლიკოს-პატრიარქმა მოსაყდრედ გამოარჩია. ,,ეს არის ისტორიული გიორგობა. წმ.გიორგიმ ინება, რომ გვყავდეს მოსაყდრე და ასეთი არის მეუფე შიო...“ - ბრძანა პატრიარქმა. ვულოცავთ, მეუფეს ამ მაღალ წოდებას! ღირსი ალექსი სენაკელის მეოხებით შეაძლებინოს უფალმა ამ საპატიო და მძიმე ჯვარის ტარება.

ვირტუალური და რეალურ-ვირტუალური ლაბორატორიის პრეზენტაცია
სკოლა-გიმნაზიაში

2017 წლის 11 ნოემბერს წმინდა ალექსი შუშანიას სახელობის მართლმადიდებლურ სკოლა-გიმნაზიაში გაიმართა ვირტუალური და რელურ-ვირტუალური ლაბორატორიის და STEM-ის (საგანმანათლებლო სისტემაზე დაფუძნებული კურსები-ფიზიკის, საინჟინრო ტექნოლოგიების, პროგრამირებისა და მათემატიკის შესწავლა თანამედროვე ტექნოლოგიების გამოყენებით) მუშაობის პრეზენტაცია, რომელსაც უძღვებოდა ზოგად საუნივესიტეტო ვირტუალური მოდელირების ცენტრის ხელმძღვანელი, ტექნიკური უნივერსიტეტის სრული პროფესორი დავით სონღულაშვილი. პრეზენტაციას ესწრებოდნენ წმიდა მეფე დავით აღმაშენებლის სახელობის განათლების ცენტრის ხელმძღვანელი რუსთველი მიტროპოლიტი იოანე (გამრეკელი), სენაკისა და ჩხოროწყუს მიტროპოლიტი შიო (მუჯირი) და წარმომადგენლები განათლების ცენტრის დაქვემდებარებაში მყოფი სკოლებიდან.

ესეების კონკურსი

2017 წლის ივლისის თვეში გამოცხადდა კონკურსი თემაზე "მასწავლებლები კონსტიტუციაზე". ესეების კონკურსის მიზანი საკონსტიტუციო რეფორმისა და კონსტიტუციაში შესატანი ცვლილებების შესახებ მასწავლებელთა დაინტერესება და მათი ინფორმირებულობის გაზრდა იყო. კონკურსში მონაწილეობა საქართველოს მაშტაბით 200-ზე მეტმა მასწავლებელმა მიიღო. დასახელდა 16 გამარჯვებული , აქედან 11 - რეგიონიდან და 5 - თბილისიდან. კონკურსში გამარჯვებულ მასწავლებლებს, რომლებმაც კონსტიტუციის თემატიკაზე ესეები შექმნეს, საქართველოს პრეზიდენტმა სასახლეში უმასპინძლა, დააჯილდოვა და სპეციალური სერტიფიკატები გადასცა. ესეების კონკურსის "მასწავლებლები კონსტიტუციაზე" სამეგრელო-ზემო სვანეთის რეგიონის გამარჯვებული გახდა წმინდა ალექსი შუშანიას სახელობის მართლმადიდებლური სკოლა-გიმნაზიის ქართული ენისა და ლიტერატურის მასწავლებელი რუსუდან მურღულია. სკოლა-გიმნაზია ულოცავს ქალბატონ რუსუდანს ამ დიდ გამარჯვებას და უსურვებს შემდგომ წარმატებებს პროფესიულ საქმიანობაში.

“ანზორ მაჩიტიძის სახელობის საჭადრაკო მემორიალი”

სამტრედიის გამგეობის, სამტრედიის ჭადრაკის ფედერაციისა და საქართველოს ჭადრაკის ფედერაციის ორგანიზებით 2017 წლის 8-11 ოქტომბერს სამტრედიის მოსწავლე-ახალგაზრდობის სახლში ჩატარდა “ანზორ მაჩიტიძის სახელობის საჭადრაკო მემორიალი” – ღია, ქალთა, 10 წლიან ჭაბუკთა და გოგონათა და 8 წლიან ჭაბუკთა და გოგონათა კატეგორიებში. მემორიალში მიიღეს მონაწილეობა მოჭადრაკეებმა საქართველოს სხვადასხვა რეგიონებიდან. ამ ტურნირში ასევე მონაწილეობდა სენაკის წმინდა ალექსი შუშანიას სახელობის მართლმადიდებლური სკოლა-გიმნაზიის მესამე კლასის მოსწავლემ გიორგი ჭანტურია, რომელმაც მეორე საპრიზო ადგილი დაიკავა. ვულოცავთ, გიორგის ამ წარმატებას და ვუსურვებთ შემდგომშიც წარმატებულ ასპარეზობას.

,,ევერესტის“ საშაბათო სკოლა

მათემატიკური ოლიმპიადა ,,ევერესტის“ დამფუძნებელი დაჩი ნანობაშვილი წმინდა ალექსი შუშანიას სახელობის მართლმადიდებლურ სკოლა-გიმნაზიასთან ერთად ახორციელებს პროექტს - ,,ევერესტის“ საშაბათო სკოლა II-VI კლასის მოსწავლეებისათვის. სასწავლო პროგრამა აგებულია იმ პრობლემების გათვალისწინებით, რომლებიც მრავლად გვხვდება დაწყებით კლასებში მათემატიკის შესწავლისას. ღია კარის დღე გაიმართება წმინდა ალექსი შუშანიას სახელობის მართლმადიდებლურ სკოლა-გიმნაზიაში, 2017 წლის 16 სექტემბერს 12:00 სთ. მისამართი: სენაკი, რუსთაველის ქ. №116 დაწვრილებითი ინფორმაციისათვის დაგვიკავშირდით: ტელ.: 551 099598: 599 573031

სასწავლო წლის დასაწყისი

წმინდა ალექსი შუშნიას სახელობის მართლმადიდებლურ სკოლა-გიმნაზიაში ახალი სასწავლო წელი დაიწყება 2017 წლის 15 სექტემბერს.სადღესასწაულო პარაკლისი და საზეიმო მიღება გაიმართება 14 სექტემბერს 10:00სთ.

განცხადება

სენაკისა და ჩხოროწყუს მიტროპოლიტ შიოს ლოცვა-კურთხევით, წმინდა ალექსი შუშანიას სახელობის მართლმადიდებლური სკოლა-გიმნაზიის ბაზაზე, არსებული საკვირაო სკოლა აცხადებს მოსწავლეთა მიღებას. სკოლაში სწავლება უფასოა. გაკვეთილები ჩატარდება შაბათ-კვირას 12.00 სთ.-დან 15.00სთ.-მდე. სასწავლებლად მიიღებიან 7-9 წლის აღსაზრდელები გასაუბრების საფუძველზე. ადგილები შეზღუდულია. ღია კარის დღე ჩატარდება წმინდა ალექსი შუშანიას სახელობის მართლმადიდებლურ სკოლა-გიმნაზიაში, 17 სექტემბერს, 14.00 საათზე. მისამართი: სენაკი, რუსთაველის ქ.№116. დაწვრილებითი ინფორმაციისათვის მსურველებმა დარეკეთ შემდეგ ნომერზე: 595005192 - ნათია დავითაია.